ADEPR yateguye gitaramo gikomeye cyo kwizihiza Pentecôte cyatumiwemo Korali 12

0
341

Itorero rya ADEPR, Ururembo rw’Umujyi wa Kigali ryateguye igiterane cyagutse cy’umunsi mukuru wizihizwaho imanuka ry’umwuka wera [Pentecôte] kizahuriramo amakorali 12 akunzwe mu bihangano byururutsa imitima ya benshi.

Pentecôte izizihizwa mu matorero yose ya gikirisitu ku wa 9 Kamena 2019.

ADEPR mu kwizihiza uyu munsi yateguye amasengesho y’iminsi 10 azasozwa, hakorwa igitaramo gikomeye kizabera kuri Stade ya Kigali i Nyamirambo ku wa 8 Kamena 2019.

Iki gitaramo kizatangira saa Mbili z’igitondo kugeza saa Saba z’amanywa cyatumiwemo amakorali 12 ari ku ruhembe rw’akunzwe cyane muri ADEPR.

Umushumba w’Ururembo rw’umujyi wa Kigali, Rev Kamanzi Callixte, yatangaje muri iki gitaramo bizeye ko Imana izakoresha abakozi bayo, abantu benshi bakabatizwa mu Mwuka Wera.

Indi ntego gifite ni ukuyobora benshi mu nzira y’agakiza, bakakira Yesu nk’Umwami n’Umukiza wabo. Abazacyitabira bazagaburirwa ijambo ry’Imana binyuze mu bigisha b’abanyempano.

Rev Kamanzi yasabye abakirisitu bose by’umwihariko abo muri ADEPR kuzitabira icyo gitaramo.

Yagize ati “Turakangurira abantu bose kuzitabira amateraniro n’amasengesho azabera mu midugudu yose by’umwihariko bakazitabira igitaramo kizabera kuri Stade ya Kigali i Nyamirambo. Twizeye ko abantu bazabatizwa mu Mwuka Wera kandi imirimo n’ibitangaza byakozwe kuri Pentecôte abantu bakazongera kubibona nkuko twabisezeranyijwe.’’

Mu makorali yatumiwe mu gitaramo harimo ayo muri Gasabo nka Korali Rubonobono, Rangurura na Ibyiringiro; Akarere ka Nyarugenge kazaserukirwa na Sayuni, Asmos n’Ababyeyi ba Muhima mu gihe Itorero ry’Akarere rya Kicukiro rizaserukirwa na Ebenezer, Impanda ya SGEM n’Ukuboko ku Iburyo yo mu Gatenga.

Aya makorali aziyongeraho Hoziyana yo mu Gakinjiro, Jehovah Jireh ya ULK na Siloam ya Kumukenke.

Rev Kamanzi yasabye abakirisitu “Kwera imbuto nk’ikimenyetso kigaragaza ko umuntu yuzuye Umwuka Wera, kuko ibindi biba ari amagambo.”

Mu 2018, igiterane cya Pentecôte cyabereye kuri Stade ya Kaminuza Yigenga ya Kigali [ULK] ku Gisozi ahari hahuriye abagera ku 3000, ku wa 19 Gicurasi 2018. Cyabaye mbere yo kwizihiza umunsi mukuru wa Pentecôte mu birori byo ku wa 20 Gicurasi 2018.

ADEPR yavutse mu 1940, itangirira umurimo w’ivugabutumwa i Gihundwe mu Karere ka Rusizi, itangijwe n’Abamisiyoneri bo muri Suède.

Mu Ukwakira 1948, nibwo Umwuka Wera yamanukiye abayoboke ba ADEPR bwa mbere bari mu Bigutu mu Karere ka Nyamasheke. Abo bose uko ari batatu bitabye Imana. Icyo gihe abagabo batatu barimo Kapitura Gabriel, Niyitegeka Phillipe na Karuhije Bernard bari basigaye ku rusengero baganira ku murimo w’Imana, bamanukirwa n’umwuka batangira kuvuga mu ndimi nshya, zidasanzwe.

Pasiteri Niyitegeka Philippe uri mu bakirisitu ba mbere ba ADEPR, babatijwe mu Mwuka Wera ni we uheruka gutabaruka; yitabye Imana ku wa 11 Gicurasi 2019, aguye mu Bitaro bya Bushenge biri i Nyamasheke aho yari arwariye.

Uyu musaza w’imyaka 95 yagize uruhare mu ivugabutumwa ryagutse no kuyobora benshi mu nzira y’agakiza kandi akabikora ashinze amanga.

Pasiteri Niyitegeka yabonye izuba mu 1924, yavukiye i Matare ahitwaga Nyakabuye, ubu ni mu Murenge wa Nkungu mu Karere ka Rusizi.

Yabatijwe mu Ukuboza 1945 atangira gukorera Imana ku wa 30 Werurwe 1949, aho yari avanwe mu ishuri kuko Pasiteri Kapitura yari arwaye. Icyo gihe yasemuriraga abamisiyoneri.

Korali Hoziana ibarizwa muri ADEPR Nyarugenge imaze kuba ubukombe mu ndirimbo zihimbaza Imana

Korali Siloam yo muri ADEPR Kumukenke na yo iri mu zatumiwe

Umushumba w’Ururembo rw’umujyi wa Kigali, Rev Kamanzi Callixte, yavuze ko abazitabira igitaramo bazahembuka binyuze mu mbaraga z’Imana